ບົດທີ 2
ເຫຕຸກາຣພຣະພຸທະສາສນາຫຼັງພຣະພຸດທະເຈົ້າປະຣິນິພພານ.
ສາສນາ ທຸກສາສນາໃນໂລກນີ້ ຈະບໍ່ມີການແຕກແຍກອອກເປັນນິກາຍນັ້ນຄົງບໍ່ມີ, ເພາະເຫັນວ່າ ພຽງແຕ່ຄວາມເຊື່ອ ຂອງຊຸມຊົນ ຫຼືຊົນເຜົ່ານ້ອຍໆ ຍັງມີຄວາມຄິດທີ່ຈະລົງລອຍກັນ ແມ່ນແຕ່ແນວຄວາມຄິດຂອງຄົນໆໜຶ່ງ ຫຼືຂອງຄົນຄອບຄົວໜຶ່ງຍັງບໍ່ຄ່ອຍຈະລົງຣອຍກັນ, ແມ່ນແຕ່ລັທ ທິການປົກຄອງ, ລັທທິທາງເສດຖກິດ ທີ່ເກີດຂຶ້ນມາໃໝ່ບໍ່ເຖິງ 100 ປີນີ້ ຍັງແຕກແຍກຄວາມຄິດກັນອອກໄປຫຼວງຫຼາຍ, ການແຕກແຍກອອກໄປຂອງສາສນາ ບໍ່ໄດ້ໝາຍວ່າຈະມີຄວາມແຕກຕ່າງ, ເຖິງຕ່າງທາງພຣະວິນັຍ ແລະຂໍວັດປະຕິບັດບາງຢ່າງ ແຕ່ຫຼັກທັມສ່ວນໃຫຍ່ ກໍຍັງມີຈຸດມຸ້ງໝາຍ ດຽວກັນ, ການແຕກແຍກຂອງສາສນາ ສາມາຖນຳໃຫ້ສາສນານັ້ນໆ ແຜ່ຂຍາຍກວ້າງອອກໄປສູ່ນານາປະເທດ, ສູ່ຊົນຊາຕຕ່າງໆ ທ່ີມີຄວາມແຕກຕ່າງທັງພູມີອາກາດ, ພາສາ, ວັດທະນະທັມ, ພື້ນທາງທາງຄວາມເຊື່ອ ແລະການປ່ຽນແປງຂອງເວລາ ສະຖານທ່ີ ພູມີອາກາດ ແລະພື້ນຖານທາງວັດທະນະທັມ ຍ່ອມກໍ່ໃຫ້ເກີດການປ່ຽນແປງບໍ່ຫຼາຍກໍ່ນ້ອຍ, ຈາກອາດີມາເຖິງປັຈຈຸບັນ ບໍ່ມີສາສນາໃດ ທີ່ຄົງທົນຢູ່ໄດ້, ສາສນາໃດທີ່ບໍ່ມີການປ່ຽນແປງ ສາສນານັ້ນກໍບໍ່ມີຄວາມຈະເຣີນແຜ່ຜາຍຂະຫຍາຍອອກໄປຢ່າງກວ້າງຂວາງ ແລະໃນທີ່ສຸດກໍຈະຕ້ອງດັບສູນໄປ, ເຊິ່ງການປ່ຽນແປງນັ້ນ ກໍບໍ່ໄດ້ໄປແກ້ຕົວບົດກົດໝາຍ ຫຼືຫຼັກທັມຂອງສາສນາ ເພາະຖ້າທຳເຊັ່ນນັ້ນ ກໍຈະກາຍເປັນການ “ທຳສັງຄະເພດ” ຫຼືບໍ່ກໍແມ່ນການຕັ້ງສາສນາໃໝ່ເລີຍ, ການປ່ຽນແປງ ໄດ້ກຳນົດເອົາແຕ່ພຽງການແກ້ໄຂວິທີການບາງຢ່າງ ທີ່ບໍ່ຂັດຕໍ່ພຣະທັມ-ວິຍັຍ ແຫ່ງສາສນານັ້ນ, ເພາະເຫຕນັ້ນ ສາສນາ ທຸກສາສນາ ຈຶ່ງມີນິກາຍເກີດຂຶ້ນມາ, ສາສນາທຸກສາສນາ ເຖິງວ່າມີນິກາຍເກີດຂຶ້ນມາຫຼາຍນ້ອຍພຽງໃດກໍຕາມ ຫຼັກທັມ ຫຼືຈຸດໝາຍເດີມ ທີ່ສຳຄັນຂອງສາສນານັ້ນ ບໍ່ມີການປ່ຽນແປງຈົນ ເຮັດໃຫ້ ຫຼັກທັມເດີມ ແລະຈຸດມຸ້ງໝາຍເດີມ ມີຄວາມປ່ຽນແປງໄປໃນທາງກົງກັນຂ້າມເລີຍ.
ຫຼັກຂອງສາສນາ ຂອງທຸກສາສນາ ລ້ວນແຕ່ມີເປົ້າໝາຍຂອງຕົນ ເປັນພຶ້ນຖານ ແລະທຸກສາສນາລ້ວນແຕ່ສອນໃຫ້ຄົນເປັນຄົນດີ ແລະມິຄວາມສຸຂ ແຕ່ພຸດທະສາສນາ ນອກຈາກສອນໃຫ້ຄົນເປັນຄົນດີ ແລະມີຄວາມສຸຂແລ້ວ ຍັງສອນໃຫ້ຄົນພົ້ນອອກຈາກອງທຸກທັງໃນໂລກນີ ແລະໂລກໜ້າ, ຫຼັກຄຳສອນຂອງພຸດທະສາສນາທີ່ສຳຄັນ ອັນເປັນການການຄົງໄວ້ເຊິ່ງ ພັດທະນາການ ຂອງການພັດທະນາມະນຸດ ດ່ັງພຣະພຸດທະອົງຕັສໄວ້ວ່າ:
“ສັພພະປັສສະ ອະກາຣະນັງ, ກຸສລັສສະສັມປະທັງ, ສະຈິຕຕ ປະຣິໂຍທະປານັງ ເອຕັງ ພຸທທະສາສະນັງ ເຊິ່ງແປວ່າ ກາຣລະຄວາມຊົ່ວທັງປວງ ການກະທຳແຕ່ຄວາມດີທັງປວງ ແລະທຳໃຫ້ຈິຕໃຈຂອງຕົນໃຫ້ຜ່ອງໃສ ນີ້ແລຄືຄຳສອນຂອງພຣະພຸດທະສາສນາ” ອັນນີ້ ເປັນບັນທັດຖານ ສພຄັນຂອງການເຮັດໃຫ້ພຣະພຸດທະສາສນາ ມີການພັດທະນາຫຼັກການປະຕິບັດບາງປະການ, ອິງຕາມສະພາບແວດລ້ອມ ທີ່ກ່າວມາຂ້າງຕົ້ນ ແລະຢ່າງໃດກໍຕາມ ພຣະພຸທທະສາສນາ ລັດທິ, ນິ ກາຍຕ່າງໆນັ້ນ ຍ່ອມມີຫຼັກສິກຂາ ຫຼືສຶກສາທີ່ສຳຄັນໄວ້ 3 ຢ່າງຄື:
1. ປຣິຍັຕິສິກຂາ: ກາຣສຶກສາຮ່່ຳຮຽນ ຕາມຄຳສັ່ງສອນຂອງພຣະພຸດທະເຈົ້າ.
2. ປຕິບັຕສິກຂາ: ຫຼັກການຣປະຕິບັຕຕົນ ໃຫ້ດຳເນີນຕຳຄໍຳສັ່ງສອນຂອງພຣະພຸດທະເຈົ້າ.
3. ປຕິເວທະສິກຂາ: ການຮູແຈ້ງແທງຕລອດຈາກກາຣສຶກສາ ແລະປະຕິບັຕ.
ຫຼັກທັງ 3 ປະການນີ້ ມີຄວາມສຳຄັນກ່ຽວພັນກັນ ຄືປະຮິຍັດ ເປັນການສຶກສາຮໍ່າຮຽນໃຫ້ຮູ້ ທິສດີຕ່າງໆໃຫ້ຮູ້ແທ້, ຮູ້ຈິງ ເໝືອນດ່ັງເຮົາຈະເດີນທາງໄປສູ່ຈຸດໝາຍປາຍທາງໃດໜຶ່ງ ປະຣິຍັດ ນັ້ນກໍຄືເຮົາສຶກສາເສັ້ນທາງ ຫຼືແຜນທີ່ນັ້ນໃຫ້ເຂົ້າໃຈ, ປະຕິເວທ ກໍຄືການປະຕິບັຕຈິງ ຫຼືຊັກຊ້ອມສິ່ງທີ່ເຮົາສຶກສາມານັ້ນໃຫ້ຊຳນິຊຳນານ ຫຼືຖ້າເຮົາເດີນທາງຈິງ ເຮົາກໍອອກເດີນທາງໄປໃຫ້ເຫັນ ຄວາມຈິງໃນສິ່ງທີ່ເຮົາສຶກສານັ້ນ, ປະຕິເວທ ກໍຄືຮັບຮູ້ ແລະເຂົ້າໃຈໃນສອງຫຼັກ ຄື ຜົລຂອງກາຣ ປະຣິຍັຕ ແລະປະຕິບັຕນັ້ນ, ວ່າມີຄວາມສອດຄ່ອງກັນພຽງໃດ ຈຶ່ງສະຫຼຸບຜົລອອກມາເປັນປະຕິເວທ ທັງ 3 ປະການນີ້ ກໍສຳພນເກື້ອໜູນກັນຂາດຫຼັກໃດ ຫຼັກໜຶ່ງບໍ່ໄດ້, ການທີ່ມີຄວາມເຫັນຜິດແຜກແຕກຕ່າງກັນບາງປະການຂອງລັທທິ ນິກາຍນັ້ນ ກໍເພາະການຜັນຂະຫຍາຍທິສດີ ບໍ່ເປັນໄປຕາມຫຼັກທັງ 3 ກໍຄືຂາດຫຼັກໃດ ຫຼັກໜຶ່ງໃນ 3 ຫຼັກນັ້ນເອງ.
ຄວາມຄິດຂອງຄົນແຕ່ລະຄົນ ທີ່ມີຄວາມເຂົ້າໃຈຕໍ່ຫຼັກທິສດີ ຄຳສອນ ວິຊາກາຣທີ່ຕົນໄດ້ຮຽນ ມານັ້ນຍ່ອມແຕກຕ່າງກັນເປັນປົກກະຕິຂອງມະນຸດຢູ່ແລ້ວ ຕ່າງຄົນຕ່າງເຂົ້າໃຈໄປຕາມພື້ນຖານ ທາງຈິດ, ທາງຄວາມຄິດ ແລະວິນຍານອັນເປັນພຶ້ນຖານຂອງຕົນ, ຄົນໜຶ່ງເຂົ້າໃຈຢ່າງໜຶ່ງ, ອີກຄົນໜຶ່ງ ເຂົ້າໃຈໄປອີກຢ່າງໜຶ່ງ, ເມື່ອມີຄວາມເຂົາໃຈແຕກຕ່າງກັນແລ້ວ ທິດຖີ ຄືຄວາມເຫັນ ກໍມີ ຄວາມແຕກຕ່າງກັນໄປເປັນທັມມະດາ ແລະແລ້ວວາທະ ແລະການປະຕິບັດກໍມີຄວາມແຕກຕ່ງກັນ ແນ່ນອນ, ເຖິງແມ່ນວ່າຫຼັກໃຫຍ່ໃຈຄວາມຈະຢືນຢູ່ຈຸດດຽວກັນກັບຕາມ ແຕ່ວາທະ ແລະກາຣປະຕິ ບັດກໍມີຄວາມແຕກຕ່າງກັນໄປ, ອັນນັ້ນ ກໍຖືວ່າເປັນການພັດທະນາຢ່າງໜຶ່ງ.
ການແຕກແຍກທາງຄວາມຄິດ ເກືອບທຸກຢ່າງ, ມັກຈະເປັນເປັນກາຣກໍ່ໃຫ້ເກີດຄວາມແຕກແຍກ, ຄວາມແຕກແຍກນັ້ນເອງເປັນຜົລທີ່ກໍ່ໃຫ້ເກີດການຂາດຄວາມສາມັກຄີ, ການແຕກຄວາມສາມັກຄີໃນສັງຄະມົນທົນ ມີມາແຕ່ສມັຍພຣະພຸດທະເຈົ້າຍັງຊົງພຣະຊົນຢູ່ ເຊັ່ນ ພິກຂຸຊາວເມືອງໂກສັມພີ ຖົກຖຽງກັນເຣື່ອງນ້ຳ ແລະພຣະເທວະທັຕທູລພຣະພຸດທະເຈົ້າ ໃຫ້ພິກຂຸໃນພຣະພຸດທະ ສາສນາ ເລີກສັນຊີ້ນສັຕວ໌ເປັນຕົ້ນ.
ໃນຂະນະນັ້ນ, ພຣະພຸດທະອົງຍັງຊົນພຣະຊົນຢູ່ ເຫຕທີ່ເກີດຂຶ້ນ ກໍລະງັບລົງໄດ້ ເພາະພຣະອົງຄ໌ເປັນຜູ້ຕັດສິນຊີ້ຂາດ ເຖິງຄວາມຄິດທີ່ບໍ່ລົງລອຍກັນຍັງມີຢູ່ ແຕ່ກໍບໍ່ກ້າກະທຳສິ່ງໃດໄດ້ ເຊັ່ນ ພຣະເທວະທັຕມີປະສົງໃຫ້ພຣະພຸດທະເຈົ້າ ບັນຍັຕສິກຂາບົດບາງຂໍ້ ກໍຕ້ອງຂໍອະນຸຍາຕຈາກພຣະພຸດທະເຈົ້າ ເມື່ອພຣະພຸດທະເຈົ້າບໍ່ຊົງອະນຸຍາດ ເຣື່ອງນັ້ນກໍງຽບຫາຍໄປ, ໃນກາຣຕໍ່ມາເມື່ອ ພຣະພຸດທະອົງຊົງປະຣິນິພພານໄປແລ້ວ ສາວົກທັງຫຼາຍໄດ້ຕີຄວາມພຣະວິນັຍແຕກຕ່າງກັນໄປ ຕາມຄວາມເຫັນແລະທິດຖີຂອງຕົນ, ຍິ່ງຄະນະສົງເຫຼົ່ານັ້ນຢ່າງເຫີນກັນໄປຄົນລະທິດລະທາງ ທິດຖີ ແລະສີລກໍວິປະຣິຕຜິດພາດໄປຕາມ ສະພາບແວດລ້ອມທາງພູທສາດ, ສັງຄົມ, ວັດທະນະທັມ ນັ້ນອັນເປັນພື້ນຖານທາງຄວາມຄິດ ກໍກາຍເປັນທິດຖີ ກໍ່ໃຫ້ເກີດວາທະ ໃນທີ່ສຸດກໍແຕກແຍກອອກໄປເປັນນິກາຍ ແລະລັທທິ.
ເຖິງຄວາມແຕກຕ່າງທາງທິດຖີ ແລະວາທະເປັນສິ່ງທີ່ກໍ່ໃຫ້ເກີດຄວາມແຕກແຍກ ແລະ ກາຍເປັນຄວາມແຕກຕ່າງຂອງພຸດທະສາສນາ ໃນທີ່ສຸດກໍຕາມ, ແຕ່ຄວາມເປັນອັນໜຶ່ງດຽວຂອງຄະນະສົງນັ້ນ ຕ້ອງປະກອບໄປດ້ວຍ ໄຕຣສິກຂາ ທີ່ເປັນອົງປະກອບຫຼັກສັມຄັນແຫ່ງພຣະພຸດທະ ສາສນາ ຄື.
ສີລສິກຂາ: ກາຣສຶກສາໃນສີລ
ປັນຍາສິກຂາ: ກາຣສຶກສາໃນປັນຍາ
ສາມາທິສິກຂາ: ກາຣສຶກສາໃນສາມາທິ.
ຄວາມແຕກຕ່າງ ຂອງສັງຄະມົນທົນ ກໍແມ່ນມີຈຸດກໍເນີດມາຈາກ ການສຶກສາທັງ 3 ປະ ການນີ້ ເມື່ອທັງ 3 ປະການນີ້ ເປັນໄປໃນວັດຖຸປະສົງເປົ້າໝາຍອັນດຽວກັນ, ແຕ່ຕ່າງຝ່າຍຕັ້ງຢູ່ໃນ ທິດຖີ ແລະວາທະຂອງຕົນ ກໍຍ່ອມໃຫ້ເກີດຄວາມແຕກຕ່າງ ແລະແຕກແຍກໃນທີ່ສຸດ, ແຕ່ຫາກວ່າ ກາຣປະພຶດປະຕິບັດຂອງສົງ ໃນສັງຄະມົນທົນ ຍັງຕ້ອງຍຶດຫຼັກສຶກສາທັງ 3 ປະກາຣເປັນເປົ້າ ໝາຍຫຼັກ ກໍຍັງໃຫ້ຄຳສອນຂອງພຣະພຸດທະສາສນາ ເດີນມຸ້ງໜ້າໄປສູ່ຄວາມຈະເຣີນໄດ້.
ຄວາມແຕກຕ່າງກັນອີກຢ່າງໜຶ່ງ ກໍເນື່ອງດ້ວຍຄະນະສົງ ໄດ້ຢຶກຖືຫຼັກພຸດທະພຸດທີ່ ພຣະ ພຸດທະອົງຊົງຕັດກັບພຣະອານົນວ່າ “ ດູກ່ອນອານົນ ໂດບກາລລ່ວງໄປແຫ່ງເຮົາ ຖ້າສົງຕ້ອງກາຣ ກໍຈົ່ງຖອນສິກສາບົດເລັກນ້ອຍເສັຍກໍໄດ້” (ມະຫາປະຣິນິພພານສູຕ 10/141)
ສົງຝ່າຍໜຶ່ງເຫັນວ່າ ເນື່ອງຈາກວ່າສິກຂາບົທເລັກໆນ້ອຍໆທີ່ພຣະ ພຸດທະອົງຄ໌ມີພຸດທະປະສົງນັ້ນ ໝາຍເຖິງສິກຂາບົທຂໍ້ໃດ ສະນັ້ນຈຶ່ງບໍ່ຄວນຖອດຖອນ ຄວນຮັກສາ ສາຂາບົທນັ້ນໄວ້ທຸກຂໍ້ເປັນການດີທີ່ສຸດ.
ສົງອີກຝ່ານໜຶ່ງ ເຫັນວ່າສິກຂາບົທເລັກໆນ້ອຍໆ ທ່ີພຣະພຸດທະອົງໝາຍເຖິງນັ້ນ ກໍໝາຍ ເຖິງສິກຂາບົທບໍ່ຈຳເປັນ ຫາກບໍ່ເໝາະສົມກັບສາພາວະແລ້ວ ກໍຄວນຖອດຖອນສາ.
ອີກຢ່າງໜຶ່ງ ການສຶກສາຮ່ຳຮຽນພຣະພຸດທະວະຈະນະນັ້ນ ຕ້ອງອາໄສອາຈາຣຍ໌ເປັນຜູ້ສັ່ງ ສອນ ແລະອະທິບາຍ ອາຈາຣຍ໌ກັບອາຈາຣຍ໌ ເກີດທັສນະຄະຕິບໍ່ກົງກັນ ອະທິບາຍພຸດທະວັຈນະ ບໍ່ເໝືອນກັນ ກໍເປັນສາເຫຕໜຶ່ງອີກທ່ີທຳໃຫ້ເກີດການແບ່ງແຍກທາງຄວາມຄິດອອກໄປ ສົງຝ່າຍ ໜຶ່ງກໍຕ້ອງແກ່ໄຂຫຍົດຍ່ອນພຣະວິນັຍໄປຕາມສະຖານະການ ຄື ຝ່າຍມະຫາສັງຄີກະ ຄະນະສົງ ພວກນີ້ ຖືພຸດທະວັຈນະໄປຕາມທັສນະຂອງອາຈາຣຍ໌ເປັນໃຫຍ່ ຮຽກວ່າ “ອາຈາຣິຍະວາທະ” ສົງອີກຝ່າຍໜຶ່ງ ຖຶເຄັ່ງຄັດໃນພຸດທະວັຈນະເດີມ ທີ່ພຣະເຖຣະຜູ້ໃຫຍ່ຍຶດຖື ປະຕິບັຕມາບໍ່ຍອມປ່ຽນແປງ ຮຽກວ່າ “ເຖຣະວາທະ”.
ຢ່າງໃດກໍຕາມ ສາເຫຕຸໃຫຍ່ຂອງກາຣແຕກແຍກທາງຄວາມຄິດ ກໍໃຫ້ເກີດວາທະ ກາຍ ເປັນກາຣແຕກແຍກສາມັຄຄີແຫ່ງຄະນະສົງ ຈົນກໍ່ໃຫ້ເກີດເປັນການປະຕິບັຕແຕກຕ່າງກັນໄປ ກາຍເປັນລັທທິນິກາຍນັ້ນ ຍ່ອມເປັນໄປດ້ວຍຫຼັກທັມ 2 ປະກາຣນີ້ ຄື:
1. ສີລະສາມັນຍະຕາ: ຄວາມວິບັຕແຫ່ງສີລ ເພາະກາຣປະຕິບັຕພຣະວິນັຍບໍ່ສມ່ຳ ສເມີກັນ.
2. ທິຖີສາມັນຍະຕາ ກາຣວິບັຕຂອງຄວາມເຫັນ ເພາະທັສນະຄະຕິ ໃນຫຼັກທັມ ອະທິບາຍກໍ່ກົງກັນ
(ກະຖາມຸຂໃນຊຸມນຸມ “ຊຸມນຸມພຣະສູຕມະຫາຍານ” ໂດຍສະຖຽນໂພທິນັນທະ)
ມູລເຫຕແຫ່ງອະທິກຣ
ໃນຈຸລວັຄປະຖະມະພາຄ ສະມະຖັກຂັນທະກະ ມີພຸດທະພາສິດສະແດງເຖິງມູລເຫຕວິວາທາທິກຣທໄວ້ດ່ັງນີ້:
1. “ວິວາທະທັນຕິ ທັມໂມຕິ ວາ ອະທັມໂມຕິ ວາ” ວິວາທະກັນວ່າ “ນີ້ແມ່ນທັມ ນີ້ບໍ່ແມ່ນທັມ".
2. “ວິນະໂຍຕິ ວາ ອະວິນະໂຍຕິ ວາ” ວິວາທະກັນວ່າ “ນີ້ເປັນວິນັຍ ນີ້ບໍ່ເປັນວິຍັບ”.
3. “ພາສິຕັງ ລະປິຕັງ ຕະຖາຄະເຕນາຕິ ວາ ອະພາສິຕັງ ອະລະປິຕັງ ຕະຖາຄະເຕນາຕິວາ” ວິວາທະກັນວ່າ “ນີ້ພຣະຕະຖະຄົຕຊົງກ່າວ , ຊົງວ່າໄວ້, ນີ້ພຣະຕະຖະຄົຕບໍ່ໄດ້ຊົງກ່າວໄວ້ ບໍ່ໄດ້ຊົງກ່າວໄວ້”.
4. “ອາຈິນນັງ ຕະຖາຄະເຕນາຕິວາ ອະນາຈິນນັງ ຕະຖາຄະເຕນາຕິ ວາ” ວິວາທະກັນວ່າ “ນີ້ພຣະຕະຖາຄົຕໄດ້ຊົງປະພຶດ ນີພຣະຕະຖາຄົຕບໍ່ໄດ້ຊົງປະຣພຶດ”.
5. “ປັນຍັຕຕັງ ຕະຖາຄະເຕນາຕິ ວາ ອັປປັນຍັຕຕັງ ຕະຖາຄະເຕນາຕິ ວາ” ວິວາທະກັນວ່າ “ນີ້ພຣະຕະຖະຄົຕຊົງບັນຍັຕ ນີ້ພຣະຕະຖາຄົຕບໍ່ຊົງບັນຍັຕ”.
6. “ອາປັຕຕີຕິ ວາ ອະນາປັຕຕີຕິ ວາ” ວິວທະກັນວ່າ “ນີ້ເປັນອາບັຕ ນີ້ບໍ່ເປັນອາບັຕ”.
7. “ລະຫຸກາ ອະປັຕຕີຕິ ວາ ຄະຣຸກາ ອາປັຕຕີຕິ ວາ” ວິວາທະກັນວ່າ “ນີ້ເປັນອາບັຕເບົາ ນີ້ເປັນອາບັຕໜັກ”.
8. “ສາວະເສສາ ອາປັຕຕີຕິ ວາ ອະນະວະເສສາ ອາປັຕຕີຕິ ວາ” ວິວາທະກັນວ່າ “ນີ້ເປັນອາບັຕສ່ວນເຫຼືອ ນີ້ບໍ່ແມ່ນອາບັຕສ່ວນເຫຼືອ”.
9. “ທຸຕຖຸລລາ ອາປັຕຕີຕິ ວາ ອະທຸຕຖຸລລາ ອາປັຕຕີຕິ ວາ” ວິວາທະກັນວ່າ “ນີ້ເປັນອາບັຕຫຍາບ ນີ້ບໍ່ແມ່ນອາບັຕຫຍາບ”.
สมัครสมาชิก:
ส่งความคิดเห็น (Atom)
ไม่มีความคิดเห็น:
แสดงความคิดเห็น