ພຸດທະສາສນາເຖຣະວາທກັບມະຫາຍານ
ບົທທີ 1
ສມັຍພຣະພຸດທະອົງຊົງພຣະຊົນ
ຫລັງຈາກພຣະສິທທັດຖະມະຫາບູຣຸດ ຊົງໄດ້ສະເດັດອອກສະແຫວງມາໂມກຂະທັມ ດ້ວຍການທ່ອງທ່ຽວໄປໃນທີ່ຕ່າງໆ ເນື່ອງຈາກໃນຂະນະນັ້ນຊາວຊຸມພູທະວີບນັ້ນ ມັກຈະອອກບວດເພື່ອສຶກສາຫາຫຼັກທັມສູງສຸດມາແກ້ໄຂບັນຫາສັງຄົມເພື່ອໃຫ້ພົ້ນຈາກກອງທຸກ ຈຶ່ງປາກົດເຫັນບັນດາພຣາມ, ນັກບວດ ແລະນັກພົດບຳເພັງຕົນ ໃນອາການກິຣິຍາຕ່າງໆ ບາງທ່ານກໍຕັ້ງຕົນເປັນເຈົ້າລັດທິ ແລະຕັ້ງສຳນັກສອນລູຸກສິດຂອງຕົນ, ສຳລັບພຣະມະຫາບູຣຸສນັ້ນ ເນື່ອງຈາກພຣະອົງເຫັນວ່າ ການທີ່ຈະເຮັດໃຫ້ມະນຸດມີຄວາມສຸຂສູງສຸດນັ້ນ ກໍຕ້ອງມີຫຼັກທັມສູງສຸດ ຄືໃຫ້ມະນຸດສາມາດຫຼຸດພົ້ນອອກຈາກກອງກິເລສທັງມວນ, ຕະລອດໄລຍະ 6 ພັນສາທີ່ພຣະມະຫາບຸຣຸດອອກສະແຫວງຫາໂມກຂະທັມນັ້ນ, ພຣະອົງໄດ້ທ່ອງທ່ຽວໄປໃນສະຖານທີ່ຕ່າງໆ ເຫັນການປະຕິບັດຕຂອງບັນດານັກພົດຕ່າງໆ ພຣະອົງຊົງເຫັນວ່າບໍ່ເປັນຫົນທາງແຫ່ງການພົ້ນທຸກ ແຕ່ຢ່າງໃດກໍຕາມໃນໄລຍະ 6 ພັນສານັ້ນ ພຣະອົງໄດ້ຕັດສິນໃຈສຶກສາໃນສຳນັກຂອງອະສິຕະດາບົດ ແລະອາຣະລາດາບົດ ເຊິ່ງເປັນຣືສີທີ່ໂດ່ງດັງ ແລະມີລູກສິດຫຼວງຫຼາຍ, ພຣະອົງກໍໄດ້ສຶກສາທັມນຳຣືສີທັງສອງນັ້ນ ຈົນສຳເຣັດວິຊາ ແຕ່ພຣະອົງ ຍັງມອງເຫັນວ່າ ຫຼັກທັມທີ່ສຶກສານີ້ ຍັງບໍ່ທັນເຮັດໃຫ້ພຣະອົງພົ້ນຈາກກອງທຸກເທື່ອ ພຣະອົງຈຶ່ງໄດ້ຕັດສິນພຣະທັຍ ອອກສະແຫວງຫາໂມກຂະທັມອີກຕໍ່ໄປ.
ຈົນມາເຖິງວັນໜຶ່ງໃນປີທີ 6 ແຫ່ງການອອກສະແຫວງຫາໂມກຂະທັມນັ້ນ, ພຣະອົງໄດ້ຕັດສິນພຣະທັຍມາປະຕິບັດທັມພຣະອົງດຽວ ແຕ່ພາຍລຸນມາກໍມີພຣາມທັງ 5 ຄົນມາມອບຕົວ ເພື່ອເປັນລູກສິດຂອງພຣະອົງ ຮຽກວ່າ ປັນຈະວັກຄີ, ເມື່ອປັນຈະວັກຄີໄດ້ຢູ່ບົວຣະບັດພຣະອົງຢູ່ນັ້ນ ພຣະອົງໄດ້ປະຕິບັດທັມຂັ້ນສູງ ແລະຢ່າງເຄັ່ງຄັດ ແລະແລ້ວໃນທີ່ສຸດຮ່າງ ກາຍຂອງພຣະອົງກໍຈ່ອຍຜອມລົງ ບໍ່ມີແຮງທ່ີຈະກະທຳທຸກກະຣະກິຣະຍາສືບຕໍ່ໄປໄດ້, ພຣະອົງກໍຊົງໄດ້ຫັນກັບມາສັນອາຫາຣ ແລະພິຈາຣະນາເຖິງການປະຕິບັດຂອງພຣະອົງໃນທີ່ຜ່ານມາ ພຣະອົງຊົງດຳຣິວ່າ ການທໍຣະມານຕົນດ້ວຍອາການຍານໂພດກໍໃຫ້ເສັຍເວລາ ຊີວິດກໍຜ່ານໄປລ້າໆ, ເມື່ອພຣະອົງ ໄດ້ປະຕິບັດເຄັ່ງຄັດ ກໍເຮັດໃຫ້ພຣະຮ່າງກາຍຂອງພຣະ ອົງໝົດກຳລັງ ເໝືອນກັບທໍຣະມາຕົນໃຫ້ເສັຍປະໂຫຍດຊື່ໆ ພຣະອົງຈຶ່ງຊົງສົມທຽບການປະຕິບັດນັ້ນ ເໝືອນກັບພິນສາມສາຍ ຄື “ສາຍທີ່ 1 ເຄັ່ງໂພດເມື່ອດີດນອກຈາກບໍ່ມ່ວນແລ້ວ ຍັງເຮັດໃຫ້ສາຍຂາດ, ສາຍທີ 2 ເມື່ອດີດແລ້ວສຽງກໍບໍ່ມ່ວນ, ສາຍທີ 3 ຄືສາຍພິນໄດ້ເຄັ່ງພໍດີ ສຽງພິກໍດັງອອກມາມ່ວນ” ເມື່ອເປັນເຊັ່ນນັ້ນ ພຣະອົງກໍຊົງກັບມາສະເຫວີຍພຣະ ກາຍາຫານ, ເມື່ອພຣະອົງກັບມາສະເຫວີຍພຣະກາຍາຫານແລ້ວ ເຮັດໃຫ້ປັນຈະວັກຄີ ຜູ້ມອງບໍ່ເຫັນມະໂນເຈຕະນາຂອງ ພຣະອົງ ກໍຄິດວ່າພຣະອົງຊົງລະຄວາມພຽນຈຶ່ງພາກັນນີ້ຈາກພຣະອົງ ໄປຢູ່ປ່າອິສິປະຕິນະມະຣິກຄະທາຍະວັນ.
ວັນໜຶ່ງ ພຣະອົງຊົງນັ່ງສຳລານພຣະວໍຣະກາຍຢູ່ແທບເຄົ້າໄມ້ສາຣະ ແຄມນ້ຳເນຣັນຊອນ(ເນຣັນຊະຣາ) ພຣະອົງ ກໍຊົງໄດ້ຮັບປະເຄນ ເຂົ້າມະທຸປາຍາຕ ພ້ອມທັງພະຊະນະຄຳ ທີ່ນາງສຸຊາດາຖວາຍແລ້ວ ພຣະອົງກໍລົງສົງພຣະວໍຣະກາຍ ໃນນ້ຳເນຣັນຊະຣາ ແລະຊົງຕັ້ງສັຈະຍາທິຖານ ວ່າຈະປະຕິບັດທັມໃຫ້ສຳເຣັດໃນຄືນວັນນັ້ນ ພຣະອົງກໍຊົງປ່ອຍພະຊະນະ ຄຳ ລົງໃນແມ່ນ້ຳເນຣັນຊະຣາທີ່ນັ້ນ ແລ້ວພຣະອົງກໍສະເດັດກັບມານັ່ງທີ່ເຄົ້າໄມ້ສາລະ(ໄມ້ຮັງ) ພຣະອົງກໍຊົງກະທຳຄວາມພຽນຢູ່ຕລອດທັງວັນ, ເມື່ອໃກ້ຄ່ຳ ພຣະອົງກໍຊົງໄດ້ກຳນົດສະຖານທີ່ໆຈະປະກອບຄວາມພຽນ ໃນເວລາຣາຕຣີ ເພື່ອຈຳຕັດສະຮູ້ໃນວັນນັ້ນໃຫ້ໄດ້, ພຣະອົງຈຶ່ງຊົງສະເດັດອອກຈາກເຄົ້າໄມ້ສາລະ ມຸ້ງໜ້າສູ່ເຄົ້າໄມ້ສີມະຫາໂພທິ (ຕົ້ນໄມ່ປ່າແປ້ງ) ເຊິ່ງເປັນສະຖານທີ່ໆສງົບສະງັດດີ, ໃນໃກ້ຄ່ຳວັນນັ້ນເອງພຣະອົງກໍໄດ້ຮັບປະເຄນຫຍ້າຄາ 8 ກຳ ທີ່ໂສຕຖີຍະພຣາມ ຖວາຍ ແລ້ວປູລາດເປັນບັນລັງ ພຣະອົງກໍສະເດັດຂຶ້ນປະທັບນັ່ງ ຊົງອະທິຖານໃນຈິຕຢ່າງໝັ້ນຄົງວ່າ:
“ເຖິງແມ່ນວ່າ ພຣະໂລຫິຕຈະເຫືອດແຫ້ງໄປຈົນໝົດສິ້ນ ເຫຼືອແຕ່ໜັງ ເອັນ ແລະກະດູກກໍຕາມ ຕາບໃດທີ່ຍັງບໍ່ທັນໄດ້ບັນລຸອະນຸຕຣະສັມມາສັມໂພທີຍາຍ ຈະບໍ່ລຸກອອກຈາກສະຖານທີ່ນີ້ຕາບນັ້ນ”
ໃນຂະນະທີ່ພຣະອົງຊົງນັ່ງ ສງົບຈິຕເປັນສະມາທິຢູ່ນັ້ນ ກິເລສຝ່າຍຂ້າງຕ່ຳ ໄດ້ປາກົດຂຶ້ນມາຂັດຂວາງຄວາມພະຍາຍາມຢູ່ໃນພຣະທັຍຂອງພຣະອົງຕລອດເວລາ, ພຣະອົງກໍຊົງຄິດເຖິງຄວາມສຸຂສຳລານ ທີ່ເຄີຍໄດ້ຮັບມາ ເພື່ອມາກຳຮາບກິເລສຝ່າຍຕ່ຳ ເຖິງປານນັ້ນກິເລສຝ່າຍຕ່ຳກໍຍັງປາກົດຂຶ້ນມາຂັດຂວາງພຣະທັຍຂອງພຣະອົງໃຫ້ຕົກລົງໄປຝ່າຍຕ່ຳ ສເມີ, ໃນທີ່ສຸດພຣະອົງກໍຣະນຶກເຖິງທັມມະຝ່າຍສູງ ອັນໄດ້ແກ່ ພຣະປາຣະນີ 10 ທັດ ທີ່ພຣະອົງເຄີຍປະຕິບັດມາໃນອະດີດ ເຂົ້າມຂົ່ມ ຄື:
1- ທານະປາຣະມີ.
2- ສີລະປາຣະມີ.
3- ຂັນຕິປ່ຣະມີ.
4- ວິຣິຍະປະຣະມີ.
5- ເນັກຂັມມະປາຣະມີ.
6- ປັນຍາປາຣະມີ.
7- ສັຈຈະປາຣະມີ.
8- ອະທິດຖານະປາຣະມີ.
9- ເມຕຕາປາຣະມີ.
10/ ອຸເປກຂາປາຣະມີ.
ມາປະຊຸມພ້ອມກັນແລ້ວ ກໍເຮັດໃຫ້ພຣະທັຍຂອງພຣະອົງເຂັ້ມແຂງ ຈົນສາມາດເອົາຊະນະມາຣ ຄືກິເລສງົບລົງໄດ້, ເມື່ອພຣະອົງຊົງຊະນະມາຣ ຄື ກິເລສລົງໄດ້ແລ້ວ, ພຣະອົງກໍຊົງກຳນົດຈິຕເຂົ້າສູ່ສະມາທິ ຈົນບັນລຸປະຖະມະຊານ, ທຸຕິຍະຊານ, ຕະຕິຍະຊານ ແລະຈະຕຸຖະຊານ ຕາມລຳດັບດ່ັງນີ້:
1. ປະຖະມະຊານ(ປະຖົມຊານ).
ຂັນຕົ້ນ ພຣະອົງຊົງໄດ້ບັນລຸ ບຸພເພວິວາສະນຸສະຕິຍານ ຄື ຍານຂັ້ນແຮກນັ້ນ ຄືລະນຶກຊາດໃນປາງກ່ອນໄດ້ ດ້ວຍພຣະຍານ ຊົງຮູ້ແຈ້ງໂດຍພຣະອົງເອງ ວ່າສິ່ງທັງຫຼາຍ ຍ່ອມເກີດຂຶ້ນດ້ວຍອົງປະກອບ 5 ປະການ ຄື:
1- ຮູບ (ດິນ, ນ້ຳ, ລົມ, ໄຟ)
2- ເວທນາ(ຄວາມຮູ້ສຶກນຶກຄິດທັງອິດຖາຣົມ ແລະອະນິດຖາຣົມ)
3- ສັນຍາ(ຄວາມຈົດຈຳສິ່ງທັງປວງ)
4- ສັງຂາຣ(ຄວາມວຽນວາຍຕາຍເກີດ)
5- ວິນຍານ()
ປະກົດການທັງ 5 ປະການນີ້ ຮຽກວ່າ “ປັນຈະຂັນ” ເມື່ອສິ່ງເຫຼົ່ານີ້ຣວມຕົວກັນເຂົ້າ ຮຽກວ່າ “ການເກີດ ຫຼືຈຸຕິ” ເມື່ອ ປະກົດການທັງ 5 ປະການ ແຍກຕົວກັນເມື່ອໃດ ຈະຮຽກສິ່ງເຫຼົ່ານີ້ວ່າ “ຕາຍ ຫຼືມໍຣະນັງ”.
2. ຕະຕິຍະຊານ(ຊານທີ 2)
ເມື່ອຮອດມັຊຊິມະຍາມ ຄື ຍາມກາງ ພຣະອົງກໍຊົງບໍເພັງທຸກຣິຍາຕໍ່ ພຣະອົງກໍຊົງບັນລຸຍານທີ 2 ຄື ຈຸຕຸປະປາຕະຍານ ໄດ້ແກ່ປັນຍາຮູ້ຈັກການຈຸຕິ ແລະການເກີດຂອງສັພພະສັດ ບາງຄັ້ງກໍຮຽກວ່າ ທິພພະຈັກຂຸຍານ ຶ້ຄືຊົງຮູ້ວ່າ ຄົນຈະດີ ຫຼືຊົ່ວ, ຈະຮັ່ງມີ ຫຼືທຸກຈົນ ກໍເພາະມີກັມເປັນຂອງຕົນເອງ ໄດ້ສ້າງໄວ້ໃນຊາດປາງກ່ອນ.
3. ຕະຕິຍະຊານ (ຊານທີ 3)
ພຣະອົງຊົງຄຳຄວາມພຽນຕໍໄປ ຈົນຮອດປັດສິມະຍາມ ຄືຍາມສຸດທ້າຍ ຊົງໄດ້ບັນລຸຍານທີ 3 ຄືອາສາວັຄຂະຍານ ໄດ້ແກ່ຄວາມຮູ້ແຈ້ງວ່າ ຂັນທີ່ມາປະກອບກັນເຂົ້າ ເປັນຕົວຕົນນີ້ ກໍເພາະເຫຕ ແລະຜົນ ເຊິ່ງມີຄວາມກ່ຽວພັນກັນຄືກັບສາຍໂສ້ ຮຽກວ່າ ປະຕິຈຈະສະມຸປະປາທະ(ປະຕິຈຈະສະມຸປປາບາທ) ເຊິ່ງທັມທັງຫຼາຍມີສ່ວນກ່ຽວໜູນພົວພັນກັນ ດ່ັງນີ້:
ອະວິຊຊາ ເປັນເຫດໃຫ້ເກີດ ສັງຂາຣ
ສັງຂາຣ ເປັນເຫດໃຫ້ເກີດ ວິນຍານ
ວິນຍານ ເປັນເຫດໃຫ້ເກີດ ນາມ-ຮູປ
ນາມ-ຮູປ ເປັນເຫດໃຫ້ເກີດ ອາຍະຕະນະ
ອາຍະຕະນະ ເປັນເຫດໃຫ້ເກີດ ຜັສສະ
ຜັສສະ ເປັນເຫດໃຫ້ເກີດ ເວທະນາ
ເວທະນາ ເປັນເຫດໃຫ້ເກີດ ຕັນຫາ
ຕັນຫາ ເປັນເຫດໃຫ້ເກີດ ອຸປະທານ
ອຸປາທານ ເປັນເຫດໃຫ້ເກີດ ພົບ(ພາວະ)
ພົບ ເປັນເຫດໃຫ້ເກີດ ຊາຕິ
ຊາຕິ ເປັນເຫດໃຫ້ເກີດ ຊະຣາ-ມະຣະນະ-ໂສກະ-ປະຣິເທວະ-ທຸກຂະ-ໂທມະນັສສະ ແລະອຸປາຍາສ.
ເມື່ອພຣະມະຫາບູຣຸດຊົງຮູ້ແຈ້ງດັ່ງນີ້ແລ້ວ ຈິຕຂອງພຣະອົງກໍພົ້ນອອກຈາກກິເລສທັງປວງ, ໄດ້ຕັສຮູ້ອະນຸຕຣະສັມ ມາສັມໂພທິຍານ ພາຍໃຕ້ເຄົ້າໄມ້ສີມະຫາໂພທິ ແຄມຝັ່ງແມ່ນ້ຳແນຣັນຊອນທີ່ນັ້ນ ວັນຕອນເຊົ້າ(ຮຸ່ງອະຣຸນ) ຂອງວັນເພັງ ເດືອນວິສາຂາປຸນນະມີ ຄື ເດືອນ 6 ເພັງ.
ເມື່ອຕັສຮູ້ເປັນອໍຣະຫັນຕະສັມມາສັມພຸດທະເຈົ້າແລ້ວ ພຣະອົງຊົງດຳຣິວ່າ ຈະເຂົ້າສູ່ປະຣິນິພພານເລີຍ ຫຼືວ່າຈະຊົງປະກາດພຣະສັຈທັມນີ້ແກ່ເວເນຍຍະສັຕວ໌ ເນື່ອງຈາກພຣະສັຈທັມທີ່ພຣະອົງຊົງຕັສຮູ້ນີ້ ເປັນທັມທີ່ຍິ່ງໃຫຍ່ອັນບຸຄຄົນ ຈະຮູ້ໄດ້ໂດຍຍາກ ທັງເປັນທັມທີ່ເຮັດໃຫ້ມະນຸດຫຼຸດພົ້ນອອກຈາກກອງທຸກໄດ້ຢ່າງແທ້ຈິງ, ກໍເນື່ອງຈາກວ່າພຣະອົງມີພຣະ ມະຫາກະຣຸນາທິຄຸນເປັນອັນຍິ່ງຕໍ່ສັຕວະໂລກທັງມວນ ທ່ີຈະນຳເອົາມະນຸສພົ້ນອອກຈາກກອງທຸກໃນໂລກນີ້ ພຣະອົງຊົງຮູ້ໂດຍພຣະຍານພຣະອົງເອງວ່າ “ມະນຸສ ແລະສັຕວ໌ນີ້ ມີຄວາມແຕກຕ່າງກັນ” ພຣະອົງຈຶ່ງຊົງເຫັນວ່າມະນຸສມີຄວາມແຕກຕ່າງກັນ 4 ປະເພດ ຄື:
1/ ອຸຄຕິຕັນຍູ: ຜູ້ຮັບຮູ້ໄດ້ໄວ ພໍຍົກຫົວຂໍ້ທັມຂຶ້ນມາສະແດງ ກໍເຂົ້າໃຈໄດ້ໂລດ ເໝືອນກັບດອກບົວທີ່ພົ້ນໜ້ານ້ຳຂຶ້ນມາແລ້ວ ກໍຖືກແສງແດດກໍເບັ່ງບານ ສະນັ້ນ.
2. ວິປະຈິຕັນຍູ: ບຸກຄົນອາດຮູ້ ແລະແລະເຂົ້າໃຈທັມ ເມື່ອຊົງໄດ້ອະທິບາຍຄວາມແຫ່ງຂໍ້ທັມນັ້ນແລ້ວ ຈຶ່ງເຂົ້າໃຈ ເໝືອນກັບດອກບົວທີ່ຢູ່ພຽງໜ້ານ້ຳ ອັນຈະເບັ່ງບານໃນມື້ໃໝ່ ສັນນັ້ນກ
3. ເຍຍຍະ: ຜູ້ພໍຈະແນະນຳໄດ້ ໄດ້ແກ່ເວເນຍຍະບຸຄຄົລ ອັນທ່ານຜູ້ສລາດໄດ້ແນະນຳ ສັ່ງສອນຢູ່ສເມີ ກໍອາດບັນລຸມັຄຄະ ຜົນໄດ້, ເໝືອນກັບດອກບົວທີ່ຢູ່ໃນນ້ຳ ຈະຜຸດຂຶ້ນໜ້ານ້ຳ ແລະເຊິ່ງຈະບານໃນວັນຕໍ່ໆໄປ.
4. ປະທະປະຣະມະ: ໄດ້ແກ່ພວກປັນຍາຕຶບ ເຖິງຈະຟັງທັມບໍ່ເຂົ້າໃຈ, ທັງບໍ່ປະຕິບັດຕາມ ຈຶ່ງບໍ່ສາມາດບັນລຸມັຄຄະ ຜົລໄດ້, ເໝືອນກັບດອກບົວ ທີ່ພວມແຕກອອກຈາກເຫງົ້າບົວ ຍັງບໍ່ທັນວ່າຈະພົ້ນຂຶ້ນຈາກນ້ຳໄດ້ ຫຼຶບໍ່ກໍອາດເປັນອາ ຫາຣຂອງເຕົ່າແລະປາໄດ້ ສັນນີ້.
ເມື່ອພຣະພຸດທະອົງຊົງພິຈາຣະນາບຸຄຄົນເຫັນເປັນດ່ັງນີ້ແລ້ວ ພຣະອົງຈຶ່ງຊົງພຣະທັຍວ່າ ຈະຊົງຢູ່ປະກາດພຣະ ສັຈຈະທັມ ພຣະອົງຈຶ່ງຊົງດຳຣິວ່າ ໃຜນໍຈະສາມາດອາດຮູ້ໄດ້ແຫ່ງພຣະສັຈທັມອັນນີ້ ແລະຈະປະທານແກ່ໃຜກ່ອນ ພຣະອົງຈຶ່ງຊົງຮູ້ວ່າ ພຣະທັມນີ້ເລີກເຊິ່ງເຫຼືອເກີນ ໃຜນໍເມື່ອໄດ້ຟັງພຣະສັຈທັມແລ້ວ ຊົງບັນລຸອໍຣະຫັນໂລດ ພຣະອົງຈຶ່ງຮູ້ໄດ້ວ່າ ບຸຄຄົນທີ່ມີປັນຍາສູງສຸດແລ້ວ ມີຢູ່ 2 ທ່ານ ໄດ້ແກ່ ອະສິຕະດາບົດ ແລະອາລະຣາດາບົດ ແລະແລ້ວພຣະອົງກໍຊົງກວດທິພພະຈັກຂຸຍານໄປຍັງຣືສີທັງສອງ ແລະຮູ້ວ່າຣືສີທັງສອງໄດ້ມໍຣະນະພາບແລ້ວ, ກໍມານຶກເຫັນແຕ່ ປັນຈະວັຄຄີ ທັງ 5 ເຊິ່ງຂະນະນັ້ນ ຢູ່ປາອິສິປະຕະນະມະຣິກຄະທາຍະວັນ ເມືອງພາຣານະສີ ພຣະອງກໍສະເດັດໄປປະທານພຣະສັຈທັມໃຫ້ ພໍດີກົງກັບວັນເພັງເດືອນອາສາລະຫະ (ເດືອນ 8 ເພັງ) ພຣະສັຈທັມທີ່ພຣະອົງຊົງຕັສເທນາຄັ້ງແຮກ ຮຽກວ່າ ທັມມະຈັກກັປປະວັຕຕະນະສູຕ, ມີອະຣິຍະສັຈ 4 ເປັນຫົວຂໍ້ທັມຫຼັກ ໄດ້ແກ່:
. 1. ທຸກຂະ(ທຸກຂ໌).
2. ສະມຸທະຍະ(ສະມຸທັຍ).
3. ນິໂຣທະ(ນິໂຣທ).
4. ມັຄຄະ(ມັຄຄ໌).
ເມື່ອຊົງຍົກຫົວຂໍ້ທັມສິ້ນສຸດລົງເທ່ົານັ້ນເອງ ພຣະໂກນທັນຍະ ກໍຮູ້ແຈ້ງໃນໄຍຍະທັມ ສຳເຣັດເປັນພຣະອໍຣະຫັນ ພຣະພຸດທະອົງຊົງຊາບແລ້ວ ກໍຊົງເປັ່ງພຣະອຸທານວ່າ “ອັນຍາ ໂກນທັນຍະ” ພຣະໂກນທັນຍະ ກໍໄດ້ເປັນພຣະສົງ ອົງທຳອິດໃນພຣະພຸດທະສາສນາ, ນັບແຕ່ຈາກນັ້ນ ເປັນຕົ້ນມາພຣະພຸດທະສາສນາ ກໍໄດ້ມີຣັຕນະຄົບ 3 ຄື ພຣະພຸດ, ພຣະທັມ ແລະພຣະສົງ ຮຽກວ່າແກ້ວສາມດວງແຫ່ງພຣະພຸດທະສາສນາ, ນັບແຕ່ນັ້ນພຣະພຸດທະອົງກໍຊົງເຜີຍແຜ່ພຣະທັມ ໄປສູ່ນິບ້ານນ້ອຍນິຄົມໃຫຍ່, ເຂົ້າສູ່ຕົວເມືອງ, ແລະມະຫານະຄອນອັນກວ້າງໃຫຍ່ ມີພຣະນະຄອນພາລານະສີ, ສາວັດຖີ ແລະເມືອງອື່ນໆເປັນກຳລັງຫຼັກແຫ່ງພຣະພຸດທະສາສນາ, ທັງພຣະສົງສາວົກຂອງພຣະອົງກໍເປັນກຳລັງສຳຄັນໃນການເຜີຍແຜ່ ພຣະພຸດທະສາສນາ ເຮັດໃຫ້ພຣະພຸດທະສາສນາ ກາຍເປັນສາສນາທີສຳຄັນ ຂອງສັງຄົມຊາວຊຸມພູທະວີບ ພຣະອົງໄດ້ຊົງ ສັ່ງສອນຄົນນັບແຕ່ຕັດສະຮູ້ມາໄດ້ 45 ພັນສາ ພຣະອົງກໍສະເດັດດັບຂັນປະຣິນິພພານ, ທີ່ພຣະແທ່ນຣັຕນະບັນລັງພາຍໃຕ້ ຮົ່ມຮັງທັງຄູ່ ທີ່ເມືອງກຸສີນາຣາ ເມື່ອພຣະຊົນມາຍຸຄົບ 80 ພັນສາເຕັມບໍຣິບູນ, ເຊິ່ງພຸດທະບໍຣິສັດທທັງ 4 ມີພິກຂຸ, ພິກຂຸນີ, ອຸປາສົກ, ອຸປາສິກາ ເປັນກຳລັງສືບຕໍ່ພຣະພຸດທະສາສນາແທນພຣະອົງ ໃຫ້ຍືນຍົງຕໍ່ໄປຈົນຕາບເທົ້າ 5000 ພຣະວັດສາ.
สมัครสมาชิก:
ส่งความคิดเห็น (Atom)
ไม่มีความคิดเห็น:
แสดงความคิดเห็น